Bersos a Santo Antonho

Actualizado em (Segunda, 14 Junho 2010 06:49) Escrito por Domingos Antão Segunda, 14 Junho 2010 00:00

Bersos a Santo Antonho

Mirai para Santo Antonho
Anriba de l sou andor,
Quiero-le oufrecer un cordeiro,
Mas nun julgo que ye l melhor.

L cordeiro ye pequeinho,
Stá un pouco amperrunhado,
De tanta fame que passou
Anté se le pelou l rabo.

Ya tal pormeti l anho passado,
Naquel die que habie nubrina,
Que you staba culas canhonas
No pan de la tie Balbina.

Que nun dezisses nada a naide,
Que you staba alhá cun eilhas,
Se fusses mexeriqueiro
Lhebabas un puxon de oureilhas.

Tu nun deziste nada a naide
Nin fuste mexeriqueiro,
You solo quiero que báian fartas
Quando éntran ne l chequeiro.

L'outordie pul meio de la nuite
Antrou l lhobo ne l chequeiro,
Matou-me dues canhonas
I inda me mordiu l carneiro.

Quebra-le ls dientes al lhobo,
Que nun coma las canhonas;
Quebra-los tamien als ratos,
Que nun me rómpan las cerronas.

Manda l garotico cun eilhas,
Que debe tener muito bagar;
Eiqui al redor de l'eigreija
Nun se debe deixar molhar.

Que baia pa l Molinico,
Pa ls Barreiros i pa la Faceira,
Que passe pul Relhuzedo,
Pa las eiras de Maçaneira.

Eiqui te fica l cordeiro
Preso cun este baraço,
Ten cuidado nun s'anforque,
Fica preso pul cachaço.

Até pa l anho, Santo Antonho!
I abisa l rapazico
Que nun se deixe drumir
I angorde l cordeirico.

Abel Antão