Dous mentirosos

Actualizado em (Sexta, 28 Março 2008 10:47) Escrito por Leonardo Antão Sábado, 09 Fevereiro 2008 08:24

 Esto acunteciu culs dous maiores cuntadores de lhonas de Zenízio.

 Tiu Cameiron i tiu Porfírio.

Stában anspirados naquel die, i íban a la feira de l Naso.

Todo acunteciu quando íban passando bien acerquita de l berçal de l tiu Porfíro.

Este dixo pa tiu Cameiron:

-Mirai bien pa las mies berças?

 Esso ye que son berças!

I cuntinou.

Algua beç bistes uas berças lhumbardas maiores qu'estas?

Respundiu tiu Porfírio:

Bi

Inda bos digo mais, tengo-las you bien maiores qu'estas, alhá pa l'Ourrieta las Guiras.
 
Adonde l'auga cuorre todo l anho, tengo alhá berças lhumbardas que son bien mais taludas que las buossas.

Mais bos digo, sien mentira nanhua, que quando las miro s'asparécen a tener l tamanho de l campanáiro de l'Eigreija.

L tiu Porfírio achou  que mesmo el dezindo que nun, era mesmo ua grande mentira.

Cumo nun gustaba de se quedar, apuis un cachico birou-le:

-Esso nun ye nada an special!

 Hai uns dias a esta parte tengo andado a dar ua mano a tiu Jesé Ferreiro a fazer un caldeiron de l tamanho de la nuossa campana grande.

 Balha-bos Dius, parquei un caldeiron tan taludo?

-Percurou tiu Cameiron.

 Porfírio arrespundiu-le:

Esso ye percura que se faga?

Puis ye para cozer las tues berças lhumbardas.