La scuola loinge de l abó

Actualizado em (Sexta, 30 Julho 2010 14:53) Escrito por Faustino Antão Quinta, 05 Agosto 2010 00:00

 

  ...nun hai abó que nun guste de todos de l mesmo modo......

 

 

Palabras sábias, i botadas nun momiento cierto, tamien nun éran por acauso, aquel sprito salagre i tienro andaba perdido

 

Tiu Hourácio d’alguns tiempos a esta parte que se benie dando cuonta de las demudas de l nieto, nun era solo nas medras, porque de tamanho yá le passaba porriba de l ombro, ambora inda fusse mui delgado, era nas cumbersas i nas cuontas, cumo s’ambaiaba, loinge staba l tiempo i l garoto sien jeito nien tino.

 

Siempre fui l nieto perferido, nun hai abó que nun guste de todos de l memo modo, el nun era defrente, mas este nun sabie bien porquei, talbeç por ser salido de la filha que inda hoije stá cun el, ou quien sabe se nun era pul jeito que siempre se dou als sous tratos. Inda tenie bien persente l sufrimiento i sfuorço que fizo para antender a la sue purmeira salida pa l Porto a studar las angenharies.

 

Mas l que alhá bai alhá abai, i dessa yá el staba sarado, las besitas nas bacanças scolares tenien cumpensado la çtáncia que ls apartaba, agora bie-lo yá maduro, home feito, ne ls modos i nas cuontas i éran las cuontas que le dában teimas, ne ls redadeiros tiempos andaba defrente, bie-se ne l modo cumo falaba i las dúbedas que lo afruntában andában strilhadas an sue cara. Se un nieto nun sabe scunder, un abó nun percisa de scuola nien de cadernos para ber estas cousas nun nieto, a demais cun este que siempre fui un lhibro abierto.

 

Serie que andában por ende saias, açumos de rapaza para cousa séria, porque de l demais, dessas maleitas que zgráçan tantos jobes el staba cunfiante, cunfiaba ne l nieto cumo nas sues manos, por esses caminos nun scambarie. Mas que staba demudado staba, ls graceijos, las risadas i las lhonas picantes habien dado a un caratéle sério. Nun habie mal nanhun nun fusse l sou recolhimiento. Aqueilhas lhonas que cuntaba de la rapazas que na cidade andán culas piernas znudas, bien cheirosas i l cuolo abierto que nien suco de charrua, yá erán de l passado.

 

Que buono i todo quedou claro, Bajamin staba mais ua beç de buolta a sue casa, l anho scolar tenie sido un eisito i mais un agarrado als calhamaços scolares i serie mais un angenheiro, fui deste modo que se serniu la cumbersa, sou abó nun perdiu tiempo, i de l mesmo modo le botou as peias.

 

-Anton nun percisas d’andar por ende de monco caído, adonde stá l miu nieto brincalhon i  galhofeiro, que m’alegraba i adeberti todos na praça?

 

Puis si abó nun ye cun bós nien cun naide, son cousas de la bida, hoije dou-me cuonta que este mundo stá todo a las abiessas, nun hai pustura, na grande cidade adonde studo nun hai culidade de bida, nun la quiero para morar, mas porqui tamien nun sei se manhana puodo ganhar la bida, nun hai an quien cunfiar, la politica i l’eiquenomie nun tóman jeito para andreitar.

Anton ye esso que t’atermenta, nun son saias, marmuru l abó!

 

Yá quedo mais çcansado, falas assi porque yá stás mais maduro, medreste cumo home i cumo giente, you antendo i sei l que son esse zfios, tamien quedo triste porque esso ye berdade, l que me dizes son las puras realidades d’hoije

Andas d’a mal cul mundo, mas puodes amar este mundo sien star d’acuordo cun el, puodes amar este mundo dando-le la mano solo naqueilho que el merece.

 

Cumo ye buono tener assi un abó, quien ls ten que ls stime.

 

Nota : Cuonta tamien publicada ne  l JORNAL NORDESTE na "FUOLHA MIRANDESA" eidiçon nº 714 de 13.07.2010

 

-Fai l tou comentairo, bonda acalcar "Eiqui"