La calma de siempre

Actualizado em (Quinta, 15 Julho 2010 09:46) Escrito por Faustino Antão Quinta, 15 Julho 2010 00:00

Ye  ampossible un çpir-se de las sues bibéncias, de l sou passado.

Cumigo tamien assi acuntece, i nun quiero you dezir que solo m’arriben a la mimória las cousas malas, nó, tamien las buonas, depende de muita cousa, adonde stamos, de cun quien stamos de l nuosso stado de felcidade, de l tiempo fai i por ende alantre.

Nestes dies, porque ten feito un suberrolho de ls catanos por todos ls lhados, buono ye dezir que l que me reçuma mais a la mimória son ls dies de calma quando tenie la suorte d’andar pul termo de Zenízio, a birar i acarretar l feno, de las segadas, acarreio i trilhas de l pan.

You digo la suorte, porque bibindo agora nua cidade tengo outros trabalhos, la calor ye tamanha mas l aire que respiro, nun ye tan lhimpo, lhougo nun ye saludable.

Quantas bezes ne l que scribo i digo, deixei antender que l tiempo dantes fui un anfierno, para nós que mos criemos culs calçones rachados, la monca ne l nariç i robendo uns rascanhos, porque ls nuossos tenien que fazer cumo diç l dito,“se quieres saber quando custa fazer pul grano, arrinca piornos ne l Eimbierno i xaras ne l berano”, tamien bos digo, l tiempo dantes ye un filme a negro i branco que nunca quiç apagar i muitas son las bezes que l relhembro.

Ne l miu rosairo de cuontas puode tener muitas de tiempos çfíceles, mas deilhes nun guardo sapeiras, la maiorie son de tiempos passados i acobilhados d’alegries i felcidade. L tiempo nun bolbe al para trás, i inda bien, se you atamei la calor i matei la sede, quando s’acababa l’auga na cántara, an lhagonas adonde las buiadas tamien l fazien, hoije yá nun ye perciso porque hai geleiras i garrafones d’auga tratada.

Tamien sei i era berdade que nessas temporadas de l anho, quando las lhabutas éran mais i mais penosas la maiorie de las pessonas até angordada.

-Fai l tou comentairo, bonda acalcar "Eiqui"