Parabienes - Nuoba einiciatiba
Actualizado em (Sábado, 12 Junho 2010 07:16) Escrito por Administrator Sexta, 11 Junho 2010 00:00

Dar ls parabienes als associados
Hoije die doze (12) de l més de Júnio de l anho de dous mil i diç (2010) l’Admenistraçon de l site bai a ampeçar ua nuoba einiciatiba.
L’einiciatiba ten por oujetibo “dar ls parabienes” a to ls sous associados, assi ne l die que l associado fai anhos, l’Admenistraçon publicará un testo de parabienes.
L’eideia ten solo por oujetibo dibulgar l die de nacimiento, die que ten muito segneficado pa l associado i pa la quemunidade de l’Associaçon an giral, nun sprito d’hounion i d’amisade.
Cuida l'Admenistraçon que esta einiciatiba pormoberá la partecipaçon i antresse de todos ls associdos
Puis fui siempre esse l perpósito quando se pensou criar este sítio, que steia al serbiçio de l’Associaçon, para las pessonas pa la quemunidade.
Mas cumo quaije to las einiciatibas, solo por eilhas nun ban a lhado nanhun, tamien esta quier l ampeinho de todos, i cumo nun puode deixar de ser tamien solo se fai a gusto de l própio.
------------------------------------------------------------------------------------------------------------------------------------------------------------------
Anton l’Admenistraçon tomou la lhibardade d’ampeçar.
I fai-lo dando “ls parabienes” al associado nº 4, Basílio João.

Que fagas muitos son ls nuossos deseios, na cumpanhie de todos ls tous familiares, amigos i de quien mais deseares, que la salude nun te falte porque l demais benirá siempre, assi cumo la gana de cuntinares a dar l tou melhor cumo siempre l fazieste al associatibismo i a la quemunidade Zeníziense. Zde la purmeira hora stubiste cumo un de ls homes no leme ne ls çtinos de la nuossa quemunidade que dou ourige a l’Associaçon Cultural i Recreatiba Nial de la Boubielha (ACRNB), partecipando cun trabalho i eideias, siempre çponible para fazer parte de ls Uorganos Diretibos, nunca te negueste al que fusse para que las pessonas se síten bien quando mos ajuntamos ne ls eibentos i fiestas. Cun paixon i muito amor a la causa social, coletiba i associatiba, fuste siempre un çfensor de la dubulgaçon de ls atos i feitos de l’Associaçon neste site, assi l’Administraçon tomou la lhibardade de poner a público l die de l tou anibersairo.
Nun te perguntemos nada, nun l lhiebes a mal, nun fumos capazes de quedar calhados.
Mais ua beç ls nuossos parabienes, que ls cuntemos i eiqui ls rebelemos muitos i muitos anhos.
Un fuorte i arrojado abraço
L’Administraçon de l site
Fai l tou comentairo, bonda acalcar "Eiqui"
Parabienes - Nuoba einiciatiba


