- La lhápede

Actualizado em (Terça, 30 Novembro 1999 00:00) Escrito por Faustino Antão Segunda, 07 Junho 2010 13:12

 

 

Bundaba un assomar-se pulas grades de l’antrada de l bielho semitério i de l lhado drento puodie ler nua singela piedra de cantarie las scassas palabras “Eiqui anterrórun Agusto Mineiro”

 

Nada mais alhá staba screbido, tamien para quei saber quando naciu ou se muorriu, quien habie tenido l’eideia de sinalar l sítio adonde agora çcansában an paç ls uossos deste probe cuitado, porque l’alma, essa cumoquiera staba bien loinge, fartica d’oubir scomungones i d’andar porqui, nun perdiu tiempo i fui-se a pedir morada cierta noutro lhugar.

 

Esta piedra mais s’asparcie a ua denunciadora, porque l quel percisaba era de ser squecido, de sçanso, de que naide se lhembrasse del, cumo maldiçon alhá staba bien na cara a quien antraba naquel sítio birado barrocal de loujas lhanas, para relhembrar la sue triste sina de pessona réles que fui an bida, remexer na mimória dun probe cuitado, dun mala rés, que medrou de mala gana.

 

Mineiro yá habie serbido l amo de l porcatorio i de l anfierno, carregaba un rosairo de anfertúnios, castigado, punido, ancarcerrado, angolhido galhofadas i zombaries de to l mundo. Fui larápio i lhambuças, matou giente se hoube poucas cousas que benírun an bien, ua deilhas fiu l die de finados, bieno cumo ua bençon debina, yá nun andaba acá a fazer nada.

 

 Tenien agora botado-le ua piedra porriba, cumo s’assi ponissen un puonto final ne l sou sufrimiento, cumo s’assi l sou nome quedasse an paç, cumo s’assi le fura prestada justícia final.

 

Mas era ua pura mentira, bundaba botar uolhos nas letras grabadas na louja que l acubrie i naide se cuntenie, i ls comentairos rumpien de l siléncio, “maldito Mineiro, nunca habies de tener nacido, nunca baliste un teçton furado, fuste un scalabrés, que pagues n’anfierno todo l mal que fazieste na tierra i nun bolbas mais”.

 

La muorte debie tener siempre la birtude de la purificaçon, de l perdon para todos, mas cuido que cun Augusto Mineiro nien siempre assi ye.

 

 

-Fai l tou comentairo, bonda acalcar "Eiqui"