Bersos-Hai muita sede

Actualizado em (Quinta, 18 Março 2010 16:56) Escrito por Adelaide Monteiro Quinta, 18 Março 2010 06:26

 (tie Adelaide)

Las nubres cargadas d'auga
Ls rius a arramar
L mar rebuolto.
Tanta auga
I assi i todo sien tanta
Para tanta sede atamar.

Sede nas bocas i ne l´alma
Ne l peito i ne ls coraçones
Que nun páran de chorar.
Ua giente cun tanta auga
I outros a morrer de sede
Sien auga pa la matar.

Hai tanta sede ne l mundo
Anque l'auga s'arrame!
Hai sede de paç i d'amor
Sede ne ls ricos i probres
Porque la sede maior
Ye aqueilha grande delor
Que nun hai auga que l'atame.

Hai muita sede nas bocas
I na piel a rachar de seca
Mas mais sede inda hai
De riqueza i de mandar
Que nien to l'auga de l mar
Chegarie para apagar
L fuogo que ne l mundo bai.

...................................................................................

-Fai l tou comentairo, dá la tue oupenion que chegará al outor.

-Ambia testos, retratos, cuontas, lhonas que las botamos eiqui ne l site

Bonda acalcar neste link http://nialdelaboubielha.org/index.php?option=com_contact&view=contact&id=1&Itemid=60