La matáncia de l cochino

Actualizado em (Sexta, 23 Janeiro 2009 13:44) Escrito por Francisco Domingues Segunda, 19 Janeiro 2009 05:00

L'antrada pa l'Associaçon "Sol Nascente" an Zenízio

 La Associaçon Sol Nasciente de Zenízio lhebou a cabo ne l die 28 de Dezembre, mais ua matáncia coletiba. Assi, por buolta de las onze i trinta de la manhana un grupo de pessonas de la ourganizaçon i colaboradores fúrun a ua loija de l Bárrio de Baixo a tener cul cochino. Apuis de abrir la puorta este saliu campante i fui andando a caras a la associaçon cumo se fusse para ua ferranha. Cuitado, mal sabie el que la sue bida staba por pouco. Deilhi a un cachico quedou arrimado al talho anriba de l qual dou ls últimos grunhidos.
L matador era buono i assi l sufrimiento de l cochino nun fui demorado. Apuis de muorto habie que l chamuscar i claro cumo yá nun hai palhas de ls restrolhs que dantes éran apanhadas para esta funçon, alhá staba un fardo de palha que fizo l mesmo eifeito. Cumo nun habie aire quedou chamuscado todo por eigual i alhá fui puosto outra beç anriba de l talho para ser bien scarolado, mas antes tirórun-se-le las caçcanhetas. Assi, cun uns cachos de cortiça fui sendo sfregado i lhabado anté quedar pronto pa l fazer la barba. Las nabalhas stában bien afiladas i ls matancieiros, inda que fúran nuobos, sabien de l oufício i depriessa l punírun a relhampar de guapo que quedou. De seguida l matador que yá habie dado ua aguçadela a la nabalha ampeçou a abri-lo i lhougo le tirou la barbada, seguindo-se la ountaça que nun era grande, apuis las tripas, la fressura i claro an último lhugar ls garrotes i las tanrielhas.
Apuis de pronto poninrun-le la staca i fui lhebado pa la Associaçon adonde quedou çpindurado para que la chicha quedasse frie.
Anquanto uns matában i purparában l cochino, outros colaboradores tratórun de l lhume i yá tenien ls fogareiros prontos pa la assadura de la chicha de l cochino que habie sido muorto ne l die antes i çfeito a la purmanhana i aceçonado ne ls barrelhones cumo se fazie als chichos para fazer ls chouriços.
Durante la matáncia stubo ua jornalista de l Nordeste a tirar retratos i anterbistou alguns de ls presentes para fazer la sue reportaige. La jornalista era ua moça nuoba i you durante las bárias eitapas de la matáncia fui cumbersando cun eilha. Quando chegou la parte de tirar las caçcanhetas spliquei-lhe l que ls moços dantes fazien cun eilhas a las rapazas. Eilha quedou mui admirada i claro que mal sabie que tamien iba a lhebar ua para Bergáncia. L matador oubiu la cumbersa i anquanto you cuntinaba a falar cun eilha bieno mui sorrateiro i alhá le metiu ua caçcanheta na carteira. Spero que quando la ancuntrou nun tenga quedado anraibada, yá que ye ua tradiçon i ua brincadeira que nun fai mal a naide.
A balorizar l spácio de l salon i la matáncia staba la sposiçon de dous de ls nuossos artesanos yá bien coincidos de todos. Assi, Alcina Pires cun algues de las sues pieças pintadas an lhouça i Tibério Delgado cun las sues pieças an fierro forjado i an einox tornórun mais rico i mais agradáble l spácio adonde durante l die i ua buona parte de la nuite ls zenizienses stubírun.
   La hora de l almuorço arrimaba-se i yá habie cerca de ciento i sessenta pessonas, l mais deilhas cun sues palaçuolas prontas para ampeçar a quemer. La ourganizaçon i colaboradores fúrun ponendo pan i chicha nas mesas i cada un fui agarrando l sou carolo i chicha para poner anriba i ampeçou a quemer. Habie tamien bino a la çriçon i claro ls que nun l bubien tenien que ir a l´Associaçon pedir auga ou cerbeija. L cumbíbio staba animado i durante algun tiempo todo mundo quemiu, buiu i fui cumbersndo.
  Apuis de todo mundo star bien cumpuosto apareciu l grupo de ls pauliteiros de Palaçuolo que animou la fiesta cun ls sous lhaços bien dançados. Stá de parabienes este grupo i cuntinai a dançar ls guapos lhaços. Apuis la ourganizaçon brindou ls persentes cun un grupo de triatro de ls lhados de l Porto que durante un cacho de la tarde animou i fizo rir las pessonas. Terminado l triatro houbo lhugar a mais cumbersa cun uns i cun outros i claro yá la ourganizaçon i ls sous colaboradores habien purparado l cochino i feito de nuobo lhume para assar la chicha pa la cena.
Antes de cenar apareciu Basileu cun un sou colega padre i un grupo de amigos benidos de Balsamão a cantar ls Reis. Parabienes al padre Basileu i a este grupo puls sous cantares i pula sue alegrie que animou inda mais ls zenizienses.
La cena yá cun menos pessonas ampeçou cerca de las uito de la nuite i claro que la fame nun era grande, mas las pessonas a la buolta de las mesas fúrun quemendo i cumbersando anté las tantas de la nuite.
Stá de parabienes l´Associaçon Sol Nasciente por esta matáncia coletiba que ben recriar las matáncias que se fazien an cada casa i que hoije yá son mui ralas. Apuis de las trilhas, las bandimas i las sementeiras, las matáncias cerrában l ciclo de las colheitas i éran un die de fiesta adonde se ajuntában ls amigos i la familha. Esta matáncia coletiba ben assi a reunir la grande familha zeniziense armanada ne l sprito de la partilha, de l´amizade i ounion.
Un bien haia a todos ls zenizienzes que stubírun nesta matância i a todos aqueilhes que por motibos de lonjura ou outros nun pudírun star i dar l sou cuntributo a este cumbíbio.
Un bien haia a todos ls colaboradores que trabalhórun chenos de buona buntade para que la familha zeniziense eili presente se santisse sastifeita i cuntenta.
Un bien haia mui grande als membros de la Direçon de l´Associaçon Sol Nasciente por esta matáncia i cuntinai siempre.
Deseio un anho de dous mil i nuobe cheno de salude i cousas buonas para todos ls zenizienses adonde quiera que stéian.